കാത്തിരിപ്പ്‌ തന്നെ
എന്നും...
വരുമെന്ന് പറഞ്ഞതല്ലേ?
കിഴക്ക് നിന്ന് വന്ന
വിദ്വാന്മാര്‍ കണ്ട
ദിവ്യനക്ഷത്രം
സാക്ഷ്യമായില്ലേ?
ഒരായുസ്സ് മുഴുവന്‍
ഞങ്ങള്‍ കാത്തു വെച്ചില്ലേ...?
വീണ്ടും വരാമെന്ന് പറഞ്ഞു
പോയതല്ലേ..?
വേട്ടനായ്ക്കള്‍ കടിച്ചു പറിച്ച
കണങ്കാലില്‍, കുടുങ്ങിയ
ചങ്ങലക്കണ്ണികള്‍
മോചനം മോഹിച്ചു പോയത്
നിന്റെ വാഗ്ദാനം കൊണ്ടല്ലേ..?
അഴിയാത്ത ചങ്ങലകളില്‍
ഞങ്ങളുടെ സ്വപ്നങ്ങള്‍ ഇന്നും
വിറങ്ങലിച്ചു കിടപ്പുണ്ടെന്ന്
നീയറിയുന്നില്ലേ...?
ഒന്നിച്ചു നിന്നാല്‍
പൊട്ടിയൊലിക്കുന്ന
കരുത്തിന്റെ ലാവയില്‍
കുരുക്കുന്ന നാമ്പുകള്‍
കുളിര്‍ കാറ്റുകൊള്ളുമെന്നു
നീ കണ്ടെത്തിയപ്പോഴും
ക്ഷമയോടെ ഞങ്ങള്‍
കാത്തു കാത്തു നിന്നില്ലേ..?!
പുകക്കുഴലുകള്‍ വിസര്‍ജ്ജിച്ച
കറുത്ത പുകയില്‍
വേനല്‍ച്ചൂടിന്റെ മിഴിവില്‍
ഇനിയുമെങ്ങനെ കറുക്കും ?!
ഒന്നിച്ചു നിന്നപ്പോള്‍
കണ്ട കിനാവുകള്‍
മരീചികകളായി
മറഞ്ഞു പോവുന്നുവോ ?
നമ്മള്‍ ഞാനായി
പിന്നെ ഞങ്ങളായി
നിയന്താക്കളായിട്ടും
അവര്‍ പറയുന്നു
കാത്തിരിക്കുക ..!
അതെ, ഞാനും നിങ്ങളും
ഇപ്പോഴും എപ്പോഴും
കാത്തിരിക്കുകയാണ്...
ആരെയോ
കാത്തിരിക്കുകയാണ്!
*****
