അവിടെയൊരാള്‍
മുങ്ങിച്ചാവുന്നു ..
മരണവെപ്രാളത്താല്‍
ഉറക്കെ നിലവിളിക്കുന്നു..
ആര്‍ക്കും സമയമില്ലായിരുന്നു
എനിക്കും...
മുങ്ങിച്ചാവുന്നവന്റെ വിളിക്ക്
മാറ്റൊലി മാത്രം മറുപടി !
വഴിയേ കിടക്കുന്ന വയ്യാവേലികള്‍
ഞാനെനെന്തിനെടുത്തണിയണം?
എനിക്കെന്റെ കാര്യം
നോക്കാന്‍ തന്നെ സമയമില്ല.
ഒടുക്കത്തെ ഒരു നിലവിളി !
അവന്‍ ചാവാന്‍ കണ്ട ഒരു നേരമേ ..!
പുലരും മുതല്‍ വൈകുവോളം
നിലക്കാതെ ഓടിയിട്ടും
ഒഴിവു സമയം തികയുന്നില്ല !
സഹായിക്കണംന്നുണ്ടായിരുന്നു
ഒരു വേള മുന്നോട്ടു വച്ചതാ...
ആരോ പിടിച്ചു വലിക്കുന്നു ..!
പുറകില്‍ നിന്ന് ഒരു മുള്ള്
കോര്‍ത്തതു പോലെ ...!
നേരത്തിനു പള്ളിയിലെത്തണം;
കൂട്ടം ചേര്‍ന്ന് മുട്ടിപ്പായി
പ്രാര്‍ത്ഥിക്കണം;
നേര്‍ച്ചക്കടങ്ങള്‍ വീട്ടണം;
നോമ്പ് നോറ്റു വീട്ടണം;
ദാനധര്‍മ്മങ്ങള്‍ ചെയ്യണം;
വേദപുസ്തകം മന:പാഠമാക്കണം;
നീ നിന്റെ കാര്യം നോക്കണം.
പരലോകത്ത്
നിനക്ക് നീ മാത്രം...
നീ ചെയ്ത പുണ്യങ്ങളും..!
ആയതിനാല്‍
എനിക്കൊട്ടും സമയമില്ല..
നീ പിന്നെയൊരിക്കല്‍ വിളിക്ക്.
ഒഴിവുകിട്ടിയാല്‍ ,
പുറകില്‍ നിന്നാരും
ഉടക്കി വിളിച്ചില്ലയെന്കില്‍,
ഞാന്‍ ഒരു കൈ തരാം...
*******
